രണ്ടു
ലൈംഗികത്തൊഴിലാളികള്‍
ബസ്സില്‍ മടങ്ങുന്നു.
വെളുപ്പാന്‍
കാലം.
നഗരത്തില്‍
നിന്ന്
രണ്ടു
ലൈംഗികത്തൊഴിലാളികള്‍
ബസ്സില്‍ മടങ്ങുന്നു.
അവര്‍ക്ക്
ഒന്നും പറയാനില്ല.
കണ്ടകറ്ററുടെ
മുന വെച്ച നോട്ടത്തിനു
അവര്‍ക്കൊന്നും
പറയാനില്ല.
ഇറങ്ങുന്നവരോ
കയറുന്നവരോ തുറിച്ചു നോക്കുമ്പോള്‍
അവര്‍ക്കൊന്നും
പറയാനില്ല.
ഉറക്കച്ചടവുള്ള
പ്രായക്കൂടുതലുള്ള സ്ത്രീയോട്
ഉറങ്ങിക്കൊള്ളാന്‍
ചെറുവാല്യക്കാരി പറയുന്നില്ല.
അവളുടെ
തോളില്‍ തലചായ്ക്കുമ്പോള്‍
തമ്മിലൊന്നും
പറയുന്നില്ല.
തലേന്ന്
രാത്രിയിലെ മുതുക്കനായ കക്ഷി
എന്തൊക്കെയോ
ചെയ്തെന്നു വരുത്തി
കള്ളടിച്ചു
ബോധം കെട്ടുറങ്ങിയതും
കൂര്‍ക്കം
വലിവിട്ടു ശല്യമൊന്നുമില്ലായ്കയാല്‍
ഏ.സി.
മുറിയില്‍
നന്നായുറങ്ങിയതും
ഓമനിച്ചുവളര്‍ത്തിയ
മുത്തച്ഛനെയോര്‍ത്തു
വെളുപ്പിന്
ഒന്ന് പുന്നാരം പറഞ്ഞതും
കിഴവന്‍
പ്രസാദിച്ചു കൂടുതല്‍ പണം
തന്നതും
ഇളം
തരുണി പറയുന്നില്ല.
ഇരുട്ടിന്റെ
മറപറ്റി ചെറുവാല്യക്കാര്‍
കൂട്ടിക്കൊണ്ടുപോയതും
രണ്ടെന്നു
പറഞ്ഞിട്ട് അഞ്ചു പേരായതും
തര്‍ക്കിച്ചു
നിന്നാല്‍ ജീവന്‍ പോകുമെന്നടങ്ങിയതും
രാത്രി
മുഴുവന്‍ മുറിയിലെ നീലപ്പടത്തിന്റെ
മുറ്റില്‍
ഉടല്‍
പഴുതുകളൊക്കെയും ഞെരിഞ്ഞു
പോയതും
മുതിര്‍ന്ന
സ്ത്രീ പറയുന്നില്ല.
കൂട്ടത്തിലിളയോന്റെ
പല്ലില്‍ മുറിഞ്ഞ മുലഞ്ഞെട്ട്
'ചോരയല്ല;മ്മിഞ്ഞ,
കുഞ്ഞേ!'
യെന്നു
ചുരന്നതും,
വെളുപ്പിന്
മുമ്പൊഴിവാക്കാന്‍
പിന്നേം
വില പേശിയോരോട് സങ്കടം പറഞ്ഞതും
എന്നാപിന്നൊന്നൂടെ
മൊതലാക്കാന്‍ ചോര പൊടിഞ്ഞതും
അഞ്ചു
പേരുടെ വിയര്‍പ്പും ഉമിനീരും
മുറിഞ്ഞ
ഉടലില്‍ ചേര്‍ന്നഴുകുന്നതും
ഇരുട്ടില്‍
തപ്പി പാതയോരത്തെത്തിയതും
അവള്‍ക്കൊന്നും
പറയാനില്ല.
കാത്തിരിക്കുന്ന
പകലിന്റെ ബദ്ധപ്പാടുകളെപ്പറ്റി
അവര്‍ക്ക്
ഒന്നും പറയാനില്ല.
അന്നൊരു
നാള്‍ മടങ്ങിയത്തുമ്പോള്‍
പ്രായം
തികയാത്ത മകളുടെ വിരിപ്പില്‍
അച്ഛന്റെ
അടിവസ്ത്രം കണ്ടതും
മകളവള്‍ക്ക്
മകളല്ലാതായതും
പിന്നതു
പതിവായതും അവള്‍ക്കാരോടും
പറയാനില്ല.
പിന്നീടൊരുര
നാള്‍ ഞാനുണ്ട് കൂടെ,
യതാണ്
മെച്ചമെന്ന് മകള്‍ കൂടെയിറങ്ങിയതും
അവള്‍ക്കാരോടുമൊന്നും
പറയാനില്ല.
രണ്ടു
ലൈംഗികത്തൊഴിലാളികള്‍
ബസ്സില്‍ മടങ്ങുമ്പോള്‍.
അവര്‍ക്ക്
ഒന്നും പറയാനില്ല.
ആരോടും
പറയാനില്ല.
അവര്‍ക്കെല്ലാം
അറിയാമല്ലോ.
എല്ലാര്‍ക്കും
എല്ലാമറിയാമല്ലോ.
