പടിയിറങ്ങുന്നു മകള്‍-
നിരാസമാമമാവാസി തീറുതന്നീ
പൊളിഞ്ഞ വീടിന്‍ പടിയിറങ്ങുന്നു,
നെറുകയിലെ മുത്തത്തില്‍
തളിര്‍ത്തു പൂത്തവള്‍.
മുറിഞ്ഞു പോവുമൊരു പ്രാര്‍ത്ഥന
ഇടനാഴിയില്‍ ചുറ്റിത്തിരിയുന്നു
വേച്ചു വേച്ച്-
നിന്റെ ആകാശങ്ങളില്‍
കാര്‍മേഘങ്ങള്‍ കൂടുകൂട്ടാതിരിക്കട്ടെ.
പിന്‍ വാതിലടക്കുമ്പോള്‍
നിനക്ക് കാലിടറരുത്, മകളെ !.
തുണ പോരേണ്ടതില്ലല്ലോ നിനക്കിനി
വഴികാട്ടിയായീ,യച്ഛന്‍ വിരലുകള്‍.
നിര്‍നിദ്രമായുറഞ്ഞുകൂടുമൊ-
രമ്മയാം നൊമ്പരം
കാവലുണ്ടാവു,മെന്നാളുമെങ്കിലും
വിതുമ്മായ്ക നീ, ശ്യാമമാം കണ്‍കള്‍
നിറയായ്ക, നിന്‍ മിഴിത്തെല്ലിലെ
നീര്‍മുത്തുകള്‍ കൊണ്ട്
പ്രളയം ചമാക്കയ്ക,യീ പാഴ് നിലങ്ങളില്‍.
No comments:
Post a Comment