നോറ്റു നേടീട്ടും അരുമ്പിപ്പോവുന്നത്.

കാന്‍സര്‍ വാര്‍ഡിലെ

നൊമ്പരക്കാഴ്ചയായി

വായും മൂക്കും മൂടിക്കെട്ടി

കുരുന്നു ബാലന്‍.

ഞരമ്പുകളില്‍ പതിയിരിപ്പുണ്ട്

അവനറിയാതെ-

മരണം.

മുലക്കണ്ണിലേക്കിറങ്ങിവന്ന

ജന്മാന്തര പുണ്യമെന്നു

തേങ്ങലടക്കുന്നുണ്ടമ്മ.

കൊടുക്കാമെന്നുയി,രെന്നാലു-

മെടുക്കരുതവനെയെന്നു

വിതുമ്മുന്നുണ്ടച്ഛന്‍.

പനിയിറക്കത്തിന്‍ നേരം

വാര്‍ഡിലെങ്ങുമവന്‍.

വികൃതി കാണിക്കരുതെന്ന്

മിഴിക്കുന്നു ഡ്യൂടി നേഴ്സ് .

'ആന്റിക്കിന്നോട് ദേഷ്യാ'ന്നു

കൊഞ്ചുന്നുണ്ടവന്‍.

മുഖം തിരിക്കുന്നുണ്ട് പെണ്‍ കൊടി.

അടുപ്പം കാണിക്കാന്‍ വയ്യവനോട്,

താങ്ങാനാവില്ല,തു പിന്നെയെന്ന്

അടക്കം പറയുന്നുണ്ടവള്‍.

പല ജന്മം നോറ്റു നേടീട്ടും

അരുമ്പിപ്പോവതെന്താവാം

ഈയിളം കൂമ്പുകള്‍?!

ഏതു പാപനാശിനിയാവാം

മതിയാവുക പകരം

ശിശുബലിയുടെ ദൈവത്തിനു?!