ഞാനിനിയും പീഡിതരേ കുറിച്ച് പറയും.
നിങ്ങള്‍ ചോദിച്ചു കൊണ്ടേയിരിക്കും:
അപ്പോള്‍ ബോക്കോ ഹറാം?
സിറിയ?ഇറാഖ്‌? അഫ്ഘാന്‍?
നിങ്ങളെന്തു കൊണ്ട്
ഇതുവരെയും
ആരെ കുറിച്ചും
പറഞ്ഞു കേട്ടില്ലെന്ന്,
ചോദിച്ചില്ലെന്ന്,
ഞാന്‍ ചോദിക്കുന്നില്ല.
സുഹൃത്തെ, നിങ്ങള്‍ക്കറിയില്ല.
വേറെയുമുണ്ട്:
തൊട്ടടുത്ത് അമ്മിനിക്കാടന്‍ മലയില്‍
നനഞ്ഞു മരിക്കുന്ന ആദിവാസിയുണ്ട്.
ഞാനവനെ കുറിച്ചും പറയുന്നുണ്ട്.
ഇന്നലെയാണ് എന്റെയീ നാട്ടില്‍
ഏഴു വയസ്സുകാരി ചീന്തിയെറിയപ്പെട്ടത്‌.
ഞാനവളെ കുറിച്ച് പറയുന്നുണ്ട്.
തെരുവുതിണ്ണയില്‍
മക്കളുപേക്ഷിച്ച മുത്തശ്ശി
ആരുമറിയാതെ മരിച്ചത്.
ഞാനവരെ കുറിച്ച് പറയുന്നുണ്ട്.
ക്ലാസ്സ്‌ റൂമില്‍ വെച്ച്
സ്കൂള്‍ വിദ്യാര്‍ഥിനി പീഡിതയായത്.
ഞാനവളെ കുറിച്ച് പറയുന്നുണ്ട്.
ഇനിയുമിനിയും പറയാനുമുണ്ട്.
എല്ലാം ഞാന്‍ തന്നെ പറയണം എന്ന് വാശി പിടിക്കരുത്.
ഇത്രയെങ്കിലുമായില്ലേ,
ബാക്കി താങ്കളും പറയൂ.
സുഹൃത്തേ,
ഒരനീതിയുണ്ടായാല്‍ ചെറുക്കണം
ഉയിര് കൊണ്ട്,
ഉടല്‍ കൊണ്ട്,
ഇല്ലെങ്കില്‍ വാക്ക് കൊണ്ട്,
അതും വയ്യെങ്കില്‍
മനസ്സ് കൊണ്ട് അതിനെ
വെറുക്കുകയെങ്കിലും ചെയ്യണം.
ഒതളങ്ങാ ചോദ്യങ്ങള്‍ നിര്‍ത്തി
ഒരു തവണയെങ്കിലും
ഒരു മനുഷ്യനാവുക.
ഞാനിനിയും ഗാസയെ കുറിച്ച് പറയും.
No comments:
Post a Comment