പ്രളയ രാവിന്റെ ഓര്‍മ്മ ദിനം.

പ്രളയ രാവിന്റെ
മൂന്നാം നാള്‍-

ഓര്‍മ്മ ദിനം.  

താഴ്‌വരയില്‍ അഴുകിയ
പക്ഷിയുടെ ജഡം-  
മുങ്ങി മരിച്ച
ഗഗനചാരികളുടെ ദൈവം. 

ഒഴുക്കെടുത്തുപോയ
ഗ്രാമ സുന്ദരിക്ക്
ഈ ചന്ദന മരം; 

സുരത സ്വപ്നങ്ങളുടെ
തെറിച്ച പെണ്ണിന്
ഇനിയൊരു പാല മരം; 

തിരകളിലൊടുങ്ങിയ
ഉണ്ണിക്കിടാവിന്
പുതുതായിപ്പൂത്ത ചമ്പകം; 

ഭയന്ന് മരിച്ച ഗര്‍ഭിണിക്ക്‌
ഇടവഴിയിലെ
ഓര്‍മ്മ കായ്ച്ച പുളിമരം; 

നാട് വിറപ്പിച്ച ചട്ടമ്പിക്ക്
കാഞ്ഞിരത്തണലില്‍
തെമ്മാടിക്കുഴി; 

കൂരയോടമര്‍ന്ന മുത്തച്ഛനു
കായ്ക്കാത്ത മാവില്‍
കത്താത്ത ചിത; 

പിന്നെ, 
തിരിച്ചു വരാത്ത ആട്ടിന്‍ പറ്റത്തിനു
മലയിറങ്ങിയ
പാറക്കെട്ടുകളില്‍
ഇടയനറിയാതെ അടക്കം.