വേനലിന്റെ വാതില്‍പ്പുറങ്ങള്‍
വല്ലാതെ പൊടി മൂടിയിരിക്കുന്നു.
ഒന്ന് മെഴുകിയെടുക്കാന്‍
ഒരു പുതുമഴയുണ്ടാവണം.
പ്രാര്‍ത്ഥനമറന്നവരുടെ നെരിപ്പോടിലേക്കു
എങ്ങനെയവും ആകാശം ഉറവ പൊട്ടുക?
കരിഞ്ഞ നാമ്പില്‍ നീരോട്ടം തേടുന്ന
തിര്യക്ദാഹമായൊരു കുളിര്‍മഴ?
പുതുമണ്‍ഗന്ധമായൊരായിരം ചിറകില്‍
പൊലിയാന്‍ പൊടിക്കുമൊരീയല്‍ മഴ?
കരഞ്ഞു വിളിക്കുന്ന തവളക്കൂട്ടത്തിന്റെ
മണ്ണിന്നകിടുതേടും തോരാമഴ?
സൂര്യതാപത്തിന്റെ ബോധക്ഷയങ്ങളില്‍
ഈര്‍പ്പം നീറ്റാനൊരു ചതിമഴ?
വിണ്ടു വെടിച്ച പാലക്കാടന്‍ മണ്ണ്പോലെ
ചൂളച്ചൂടായൊരു തീമഴ?
നഗര വിഴുപ്പില്‍ വസൂരി പടര്‍ത്തുന്ന
ആശുപത്രിക്കാലത്തിന്റെ പനിമഴ?
അല്ലെങ്കില്‍,
നിരാശാഭരിതനായ കവിയെ പോലെ
അശനിപാതങ്ങളുടെ അമ്ല മഴ?
അതുമല്ലെങ്കില്‍,
വന്മരങ്ങളാല്‍ താണ്ഡവം തീര്‍ത്ത്‌
ചുടലത്താളത്തിലൊരു പ്രളയ മഴ?
നിര്‍ഭാഗ്യവാനായ കൃഷീവലനെ പോലെ
ജീവിതം ചുഴിയെടുത്തൊരു പെരുമഴ?
പാപികളുടെ പ്രാര്‍ത്ഥനക്കൊടുവില്‍
എങ്ങനെയവും ആകാശം ഉറവ പൊട്ടുക?
No comments:
Post a Comment