Featured Post

Saturday, April 19, 2014

ചാരുകസേരകള്‍

ചാരുകസേരകള്‍
വലിയ സൗകര്യമാണ്.
പിന്‍ചിന്തകളുടെ മുന്‍തുണ കിട്ടും നിങ്ങള്‍ക്ക്.
ഹാംലെറ്റ് നിങ്ങളെ കണ്ടു പഠിക്കും.

രതിയുടെപൈശാചത്തില്‍
കുഞ്ഞുമോളുടെ ജീവനെടുത്തോനെ
ഒറ്റത്തീക്കരള്‍പിടപ്പില്‍ കൊന്നു തള്ളിയോനെ
കൊഞ്ഞനം കുത്തിയൊരു വിധിപറയും
അവനതിന്റെ ഒരു കാര്യോമില്ലാരുന്നു,
കോടതീം നെയമോം ഒക്കെയില്ലേ ഇന്നാട്ടില്!
കൂട്ടം ചേര്‍ന്ന് കടിച്ചു കീറപ്പെട്ടവളെ
ഒറ്റയടിക്ക് ഭ്രഷ്ടയാക്കും
വേണോങ്കി എന്തൊക്കെ വഴിയൊണ്ടാരുന്നു!
അവളും ഒരുങ്ങിത്തന്നെയാ.
ഇല്ലേല്‍ ഒന്നങ്ങ് ഒച്ച വെച്ചാപോരായിരുന്നോ,
ഇല്ലെങ്കി ഒരൊറ്റ എസ്സെമ്മെസ് ,
ഇക്കാലത്ത് എന്തൊക്കെ സൗകര്യങ്ങളാ !
നാടെരിയുമ്പോഴും ചടഞ്ഞിരുന്നിട്ട്
അനങ്ങാപ്പാറക്ക് നാക്ക് വെച്ചിട്ട്
വ്യവസ്ഥിതിയെ തെറി വിളിക്കും:
ഓ, ഇതോണ്ടൊന്നും ഒരു കാര്യോമില്ലെന്നേ,
എല്ലായിടത്തും അഴിമതിയല്ലേ !
എന്ത് വന്നാലും ഒത്തു വരും,
നെല്ലായാലും പതിരായാലും നൂറു മേനി :
നമ്മളപ്പഴേ പറഞ്ഞില്ലേ !
മുറ്റത്തെ തൈത്തെങ്ങ് പശു തിന്നുമ്പോള്‍
ആ പഴയ ഉണ്ണിയെ പോലെ
മന്ദസ്ഥായിയില്‍ ആമന്ത്രണം ചെയ്യും:
ഇവിടെ പശു, ഇവിടെ പശു.


ഉള്ളിലൊക്കെയും ചാരുകസേരകള്‍
ഉരുവം കൊണ്ട് തുടങ്ങുമ്പോഴാണ്
മാനത്തിനു പിടയുന്ന നിലവിളികള്‍
റെയില്‍പ്പാളങ്ങളിലൊടുങ്ങുക.
അഭയം തേടുവോരുടെ രക്തം
തെരുവോടങ്ങളില്‍ നിറയുക .

No comments:

Post a Comment